Како ги продадов првите акции на Македонска берза?

Купивте акции на Македонска берза. Честитки! А сега, како да ги продадете?

Пред некоја недела, ја отворив вратата кон светот на инвестирањето со приказната за тоа како ги купив моите први акции. Но, неодамна, препрочитувајќи го текстот, сфатив нешто клучно: ја отворив вратата, но никогаш не ја затворив.

Затоа што купувањето е само половина од равенката.

Да, можете долгорочно да ги чувате акциите и да уживате во повремената дивиденда. Тоа е солидна стратегија што носи просечен принос. Но, за оние кои сакаат да постигнат повеќе, вистинската уметност лежи во познавањето на моментот за излез. Основното правило во инвестирањето е измамнички едноставно: „купувај евтино, продавај скапо“. Но, додека прашањето „што е евтино?“ е тема за цела нова дискусија, прашањето „како се продава?“ е практична вештина што мора да ја совладате.

Што всушност продавате?

Да се потсетиме на основата: акцијата е ваш сопственички удел во една компанија. Кога продавате, вие всушност го пренесувате тој удел на друг инвеститор по цена која е одредена исклучиво од понудата и побарувачката во тој момент. Оваа трансакција се случува на Македонската берза – единственото регулирано и безбедно место за тргување со хартии од вредност кај нас. Целиот процес е транспарентен, а евиденцијата за сопственост ја води Централниот депозитар за хартии од вредност, што ви дава сигурност дека вашата зделка е легална и заштитена.

Водич во 4 чекори: Како да ги претворите акциите во готовина

Јас ги продадов моите први акции само неколку недели по купувањето, остварувајќи профит. Но, сум продавал и акции со загуба – и тие лекции болеа најмногу. Процесот е ист, но психологијата е сосема различна. Еве ги чекорите:

Чекор 1: Изберете брокер на кој му верувате (ако веќе немате)

Ако веќе сте купувале акции, овој чекор го имате завршено. Но, ако сте ги стекнале акциите на друг начин (наследство, приватизација), ова е вашата почетна точка. Немојте да го бирате брокерот само според провизијата. Добриот брокер е вашиот партнер. Во моменти кога треба брзо да реагирате за да „фатите“ добра цена, неговата ефикасност, пристапот до е-трејдинг платформи и квалитетната поддршка вредат злато.

Чекор 2: Формализирајте го односот

Како и при купувањето, ќе треба да склучите Договор за посредување со брокерската куќа. Ова е стандардна процедура со која ги дефинирате условите под кои брокерот ќе ги извршува вашите налози за продажба.

Чекор 3: Дефинирајте стратегија за излез – и држете се до неа

Ова е најважниот, но и најтешкиот чекор. Многумина го прескокнуваат и потоа скапо плаќаат. Анализирајте по која цена се тргувала вашата акција и одредете реална цел. И бидете одлучни. Не се коцкајте за ситници. Ако се појави купувач со понуда блиску до вашата цел, дејствувајте.

И ден-денес се каам за две-три акции, кои за десетина денари по цена на акција не успеав да ги продадам. После тоа следуваше крах и акциите никогаш повеќе не го достигнаа тоа ниво.

Оваа лекција ме научи дека дисциплината и рационалноста се поважни од било каква техничка анализа.

Чекор 4: Извршете ја продажбата

Процесот е едноставен: му давате налог за продажба на вашиот брокер (лично, телефонски или онлајн) по цена што сте ја одредиле. И потоа чекате. Понекогаш, ако вашата акција е ликвидна (има голем интерес за неа), продажбата може да се случи во истата секунда. Но, понекогаш може да трае со денови, месеци, па дури и години. Ако чекате предолго, тоа е јасен сигнал – или вашата барана цена е нереална, или акцијата е неликвидна.

Кога трансакцијата ќе се реализира, добивате извештај на вашата е-пошта, а средствата ќе бидат префрлени на вашата сметка во рок од неколку дена. Честитки, успешно ги претворивте вашите хартии од вредност во пари.

Што откако ќе продадете?

Сега кога ја затворивме вратата, пред вас се отвора нова. Средствата се на вашата сметка, подготвени за реинвестирање. Можеби сега барате инвестиција која ви нуди поголема флексибилност и ликвидност.

Најголемото прашање во инвестирањето не е како да продадете, туку кога. А одговорот на тоа прашање е она што ги двои просечните од успешните инвеститори.

Следни чекори

Јас лично инвестирам преку активно управувано портфолио на акции и инвестициски фондови. Постојано ги следам најдобрите компании, анализирам вреднување, раст и ризик, и вложувам само кога постои реален потенцијал. Ако размислувате повторно да го активирате вашиот капитал, не мора да го правите тоа сами. Тука сум да ви помогнам да изградите портфолио што расте – стабилно, дисциплинирано и со целосна ликвидност.